Mision ti CIAS/SIKA ti mangummong kadagiti insursurat dagiti Ilokano a mannurat, mangtagiben ken mangpasantak kadagitoy ken iti kultura Ilokana, ken mangtaginayon kadagiti amin a napintas, makaparagsak, ken makaited-dayaw a gapuanan ti kaputotan dagiti Ilokano ken taga-Amianan. Ni Dr. Alegria T. Visaya, propesor ti Graduate School, university secretary ken secretary ti Board of Regents ti MMSU, ti nadutokan a mangidaulo iti daytoy a sentro. Ni Dr. Visaya pay ti umuna ken agdama a pangulo ti Nakem Philippines, maysa a gunglo dagiti akademiko nga agsuksukisok maipanggep ti Iluko ken kultura Ilokana. Padakkelen ken pasantakento ti Sentro ti gapuanan ken koleksion ti dati nga Iloko Research and Information Center (IRIC) nga immatonan idi ni Dr. Ernesto Ma. Cadiz, retirado a propesor ti MMSU.

Ni Dr. Miriam E. Pascua, presidente ti MMSU, ti mangipaay iti mensahe iti programa a manglukat iti CIAS/SIKA nga addaan iti tema: Pasantaken: Kultura Ilokana. Ti mangsarabo kadagiti bisita a tumabuno ket isu dagiti Tamboreros ti School of Living Traditions nga idauloan ni Dr. Venus P. Taylan iti Ilocos Norte National High School. Kasakbayan ti programa, malukatan ti eksibit a pakairamanan ti: 1) Samtoy (Saomi ditoy), koleksion dagiti libro ti IRIC ken miembros ti GUMIL; 2) Tagnawa, koleksion dagiti retrato nga ala dagiti kameng ti The Ilokandia Photographic Society (TIPS); ken 3) Kusina, koleksion dagiti alikamen iti tradisional a kusina.

Inurnos da Dr. Lucena R. Felipe ken dagiti librarian a kaduada ni Dr. Natividad E. Lorenzo ti Samtoy. Dagiti met propesor ken estudiante ti BA Sociology ti College of Arts and Sciences ti nangurnos iti Kusina eksibit. Idauloan ni Dr. Jose B. Orosa III iti Mariano Marcos Memorial Hospital and Medical Center ti TIPS a pakipagkamengan ni Mr. Edwin Antonio, miembro ti Nakem-Phil. ken nangyasideg iti foto eksibit iti CIAS/SIKA.

Maipabuya iti programa dagiti nadumaduma a nakaisigudantayo nga aramid-kultural, kas iti kanta, bukanegan, dallot, suelto ken daniw nga isagut saan laeng a dagiti mangisursuro ken agad-adal iti MMSU no di pay ket iti Ilocos Norte National High School. Ni Dr. Epifania O. Agustin, bise presidente para iti academic affairs ti MMSU, ti mangkablaaw kadagiti dumar-ay. (Dr. Anabelle C. Felipe, Dean for Instruction)