CAFSD
CASAT
CAS
CBEA
CCIS
COE
CHS
CIT
CTE
COM
CVM
Graduate School<B><P align=left><FONT face=Verdana size=5>Regional MLE Orientation-Training naiyusuat</FONT></P></B>
Mainaig iti pannakaiyetnag ti DepEd Order No. 74, series 2009 a mangilunglungalong iti pannakaaramat ti nakayanakan a pagsasao iti panagisuro iti ubbing manipud Grade I inggana iti Grade III, inangay ti MMSU College of Teacher Education (CTE) ti agdua nga aldaw a taripnong idi Setiembre 17-18, 2009. Kangrunaan a panggep ti ganuat ti adadda a pannakaawat dagiti mangisursuro iti nasao a pammilin a manamnama a maipatungpal iti sumaruno a panagseserrek.
Manipud iti Departamento ti Edukasion (DepEd) ken kasta met dagiti Teacher Education Institutions iti Rehion I, agdagup 135 dagiti dimmar-ay a mangisursuro iti Grade I - III, administrador ken faculty iti kolehio a mangisursuro kadagiti professional education courses. Addada pay Day Care Workers a nagpartisipar.
Dimmar-ay pay ni Dr. Cherrie Melanie A. Diego, chief ti Technical Services Division ti Commission on Higher Education-Region I kas nangisuno ken ni Dr. Caridad O. Abuan, OIC Director. Kasta pay ni Atty. Ramon A. Leano, Vice President for Administration ti MMSU, a nangisuno met ken ni Dr. Miriam E. Pascua, presidente.
Naluktan ti taripnong babaen iti ababa a programa kas pangsarabo kadagiti timmabuno. Nangipaay ti CTE Chorale iti kanta a pagdaydayaw iti Namarsua sa naisaruno ti Nailian a Kanta iti Illuko (kas impatarus ni Prop. Gregorio T. Amano, sigud a propesor ken dekano ti MMSU College of Technology). Inted met ni Dr. Eduardo T. Borja, dekano ti pagadalan ti balikas pannarabo. Kalpasanna, nagsubli met la manen ti CTE Chorale tapno ipangngegna ti kanta nga \"Amianan.\"
Inyam-ammo met ni Prof. Edna C. Nagtalon dagiti timmabuno manipud Pangasinan, La Union, Ilocos Sur, Ilocos Norte, Northern Christian College ken MMSU CTE. Insaruno nga impalawag ni Dr. Alegria T. Visaya ti rasional ken dagiti panggep ti taripnong.
Adda iti baba dagiti topiko ken dagiti napusgan a naglektiur:
1) Ti Panagdur-as ti Ilokano kas Nailian a Pagsasao
Dr. Jaime G. Raras, research coordinator ti University of Northern Philippine-Candon City campus
2) Dagiti sangapulo a kangrunaan a Sagudayen ti DepEd Order No. 74. series 2009
Dr. Cecilia P. Aribuabo, Schools Division Superintendent ti Division of Ilocos Norte
3) Dagiti Rason no Apay a Nalalaing dagiti Ubbing a Filipino no Agusarda iti Bukodda a Lengguahe
Prof. Marlina L. Lino, College of Arts and Sciences, MMSU
4) Ortograpia ken Grammar ti Iluko
Mr. Reynaldo E. Andres, mannurat ken kameng ti Ilocos Agricultural Resources Research and Development Consortium (ILARRDEC) iti MMSU
5) Nadumaduma nga Estratehia iti Panangisuro ti Panagbasa
Dr. Estrella R. Calixto, Research Director, Northwestern University, Laoag City
6) Panagsurat iti Sarita a Para Ubbing ken Panangaramid iti Giya ti Panagbasa
Mr. Joel B. Manuel, Mannurat iti Iluko ken prinsipal ti Banna National High School
7) Dagiti Konsepto ken Pakainaigan ti Panangisuro ken Teknolohia
Prof. Rose Francis E. Mina, BEEd Department Chair, MMSU-CTE
8) Dagiti Sukisok Panggep iti MLE iti Pagilian ken Ballasiw-Taaw
Dr. Alegria T. Visaya, Propesor, MMSU-Graduate School
Iti pangrikep a programa, inted dagiti sumagmamano a mangisursuro dagiti impresionda iti naangay a taripnong. Indaniw pay ni Mrs. Jannet Marco ti impresionna. Indauluan met ni Mrs. Agustina R. Velasco, District Supervisor ti Vintar, ti panagsapata ti amin a partisipante a mangsuporta ti MLE iti bukodda a pagadalan.
Addanto ti sumaruno a taripnong tapno marugianen ti panagsurat kadagiti kasapulan iti panangisuro kangrunaan dagiti libro.
(Prof. Edna C. Nagtalon, CTE)
Gallery
_91c2e13bde54cafe009c166f9aa4199f.jpg)
Dear Valued Client,
We will be introducing our newly upgraded website on October 31, 2024 – offering faster access, improved navigation, and enriched content for students, faculty, partners, and stakeholders. Experience how we cultivate minds and transform futures at MMSU.