Napagbalin ti IRCIP nga Iloko Research and Information Center (IRIC) idi Enero 21, 1986 iti administrasion ni Dr. Santiago R. Obien, maikadua a presidente (Mayo 1, 1985 - Mayo 31, 1987).  Napadakkel ti koleksion dagiti libro ken dadduma pay a sinurat ken resulta ti sukisok dagiti sumagmamano a manursuro ken estudiante.  

Dua ti naipablaak a libro idi panagpangulo ni Dr. Felipe B. Cachola, maikatlo a presidente (Hunio 1, 1987 - Mayo 31, 1993): ti Ilocos Norte: Gem of the Northern Plains idi 1988 ken ti IRIC: Antolohia Dagiti Daniw ken Sarita iti dayta met laeng a tawen. 

Nagtultuloy ti IRIC idi administrasion ni Dr. Elias L. Calacal, maikapat a presidente (Hunio 1, 1993 - Mayo 31, 1999).  Iti daytoy a panawen, nainaw ti pannakasurat ti sabali pay a libro ken nagtultuloy ti panagukkon iti sinurat dagiti estudiante maipanggep iti kutura ni Ilokano.

Idi 2001 a parte ti administrasion ni Dr. Saturnino M. Ocampo, maikalima a presidente (Hunio 1, 199 - Oktobre 27, 2004), naimaldit  ti libro nga Batac: Cradle of Eminent Men and Women. Naipatarus pay daytoy iti sabali a libro a napauloan iti Batac: Nakatagibbian dagiti Nalatak a Lallaki ken Babbai. 

Ni Dr.  Ernesto Ma. Cadiz ti napusgan a Director ti IRIC ken nagsurat iti kaaduan kadagiti sukisok.  Nakaduana a nagsurat da Prop. Gregorio T. Amano, Dr. Visitacion Mamuad, Dr. Teresita Coloma, Dr. Mary Ebitha Dy, Mr. Reynaldo Andres ken Ms. Bella Curammeng (Mrs. Gervacio itan). Bimmadang met da Mrs.Joy Gertrud Flojo ken Mr. Loe Jay Lopez. Dakkel met ti suporta ni Prof. Bucalen C. Saboy, dati a University Librarian.  Naitaeng ti IRCIP ken IRIC iti University Library.

Idi Nobiembre 2006, nangipresenta ni Dr. Alegria T. Visaya iti maysa a sukisok iti Nakem International Conference nga inesponsoran ti Ilokano Program ti University of Hawaii (UH) at Manoa.  Kadagupan dagiti delegado, isu ti napili a mangipangulo koma iti kasta a kumperensia iti Pilipinas.  Immanamong ti MMSU Board of Regents nga impanguloan idi ni Dr. Miriam E. Pascua, maikanem a presidente (May 3, 2005-Present) iti daytoy a singasing iti Joint UH-MMSU Administrative Conference a naangay idiay UH iti dayta met laeng a bulan ken tawen.  Maysa met ni Dr. Visaya kadagiti inadalan ni Dr. M. D. Zamora iti uneg ti maysa a semestre iti MMSU Graduate School.

Ti pannakairusuat ti Center for Ilokano-Amianan Studies (CIAS) wenno Sentro ti Iluko ken Kultura ti Amianan (SIKA) ket isut’ mangidalan iti panangituloy ken panangilawa pay kadagiti rinugian ti IRCIP ken IRIC. Idarirag ti Sentro ti pannakipaset ti ad-adu pay nga akademiko tapnon kidagna ket marikna ti kagimongan dagiti Ilokano ken taga Amianan, iti intero a pagilian ken dagiti napagbalinda a komunidad iti sabali a pagilian. (ATV 2009)