Instructor, College of Arts and Sciences

Ama ti Sangalubongan: Agun-unnoykami Kenka a taliawennakami a tattaom, ket ibukbokmo kadagiti pusomi ta nasantoan nga Espiritum, tapno maaddaankami iti grasia ken sirib a mangbigbig iti kinaasinomi, ket maamirismi dagiti kinasiglat ken dagiti kinarasimi.

Adu kadakami ti agbibiag iti kinakunniber, kinaagum ken kinadangkok, gapuna a malipatanmi a daytoy pagilian, wenno aniaman a pagilian, ket di agbiag, tumanor ken dumur-as no saanmi masursuro ti agbiag a kas agkakabsat ken agkaykaysa a mangitandudo iti pagayatan ti kaaduan saan ketdi a ti panangisikat iti kabukbukodan a panggep ti sumagmamano a mananggundaway.

Ipaayannakami iti pigsa a mangbalbaliw ’toy panagbiagmi,ken pakirdennakami ta maanduranmi a tallikudan ti kinamanagimbubukod, kinakunniber ken kinadakes.

Silawannakami ta makitami ti kababalin ken kabaelanmi, luktam dagiti mata ken ti nakullaapan a panunotmi, ket silnagam dagiti pusomi tapno maipaaymi ti umisu nga aramid ken bambanag a makapadur-as ken makapapintas ’toy pagilian, a puon ragsak ken liwliwa ti amin.

Ipaaymo a maamirismi ti kinatan-ok ken kinadaeg ’toy di agressat nga annongmi, dawatenmi ta pannarabaymo iti inaldaw-aldaw a panangsarangetmi kadagiti karit ti panagbiag.

Isuronakami nga agtalinaed a sinanama ken sikakapet iti pammati, ipakitam ti pudno a wagas ti panagserbi, serbisio a saan nga agur-uray kasukat, ipamatmatmo a ti panagserbi iti tattao ket isu ti dana a pakaipeksaan ken pakabuklan ti kinataomi.

Isuronakami a ti panagserbi ket wagas a pannakipasetmi kadagiti adu a sakripisiom kadakami.

Dinakami baybay-an nga umannugot iti sulisog ti panagpabaknang, panagtakaw ken pannakabartek iti turay, ngem ketdi pagbalinennakami a natakneng, naragsak ken nanakman a puli dagiti tao.

Idalanmo dagiti pangulomi nga agtignay a silalagip kadagitoy a kagagalad, natan-ok ngem napakumbaba, napakumbaba ngem masirib, masirib ngem nainkalintegan, nalinteg ngem manangngaasi ken managayat kadagiti kailian.

Sapay ta agserbida a sipupudno iti umisu para iti tunggal tao, ken agtignay a sinanakem a kas maysa a kameng ti kagimongan. Dalusan ken patarnawennakami, ikkatem ti pungtot, sakit ti nakem ken dagensen ti napalabasmi.

Parmekem ti panagduaduami, pagbalinennakami a maikari nga agserbi a kas maipaay a sakripisiomi tapno dagiti tao dumur-asda ket sidadaanda a mangsaranget kadagiti pannubok ti masakbayan.