NABUANGAY itay nabiit ti umuna nga organisasion dagiti mannurat iti Iloko nga estudiante iti Mariano Marcos State University (MMSU), kangrunaan nga unibersidad iti Amianan, iti panangisayangkat ti Timpuyog dagiti Mannurat iti Iluko iti Filipinas (TMIF).

Iti maysa a taripnong iti conference hall ti MMSU, napili dagiti sumaganad a kas opisial ti TMIF-MMSU:

Presidente, Eloiza Felipe; bise presidente, Ramil Baltazar; sekretaria, Rose Bernadette Tarriga; tesorera, Abigail Fritzie Domingo; auditor, Ma. Isabella Alice Paz; business manager, Nestor Corrales, Jr.; ken public information officer, Jonas Paul de la Cruz.

Mammagbaga ni Fides Bernardo A. Bitanga, mangisursuro iti MMSU CAS. Katulonganna ni Herdy Yumul, hepe ti Print Media Section ti Communication and Media Relations Office ti nasao nga unibersidad ken bise presidente iti TMI Ilocos Norte

Kaaduanna kadagiti opisial ti TMIF-MMSU ti kameng ti editorial staff ti Sirmata, ti opisial a pagiwarnak dagiti estudiante iti MMSU. Ni Felipe ti editor-in-chief ti Sirmata ken Ayuyang, ti literary folio dagiti estudiante a mannurat, idinto a presidente ti Supreme Student Council ni De la Cruz ken agpapaay pay kas university student regent.

University-wide organization ti TMIF-MMSU ken sakupennanto dagiti nadumaduma a kampus ti unibersidad a kas ti Batac, Laoag, Paoay, Currimao ken Dingras.

Dimmar-ay iti taripnong da Dr. Alegria Tan-Visaya, sekretaria ti Board of Regents ti MMSU, ken Prof. Henedine A. Aguinaldo, direktor ti Student Services and Development. Inyunay-unayda ti panangaramat dagiti estudiante iti Iloko, saan laeng nga iti panagsuratda no di pay ket iti ordinario a pannakipatpatang.

Sakbay ti eleksion dagiti opisial ti TMIF-MMSU, naaramid ti maysa a seminar maipapan iti ortograpia Iloko ken panagsurat iti daniw agraman kritisismo iti Ayuyang ken dagiti annuroten ti panagsurat iti bukod a pagsasao. Insayangkat daytoy da Severino V. Pablo, kolumnista ti The Ilocos Times ken adviser ti GUMIL Ilocos Norte; Virgilio Valdez, kameng ti TMIF board; ken Peter La. Julian, koresponsal ti Philippine Daily Inquirer ken mammagbaga iti TMIF.

Iti maysa a pannakiinnumanna kadagiti agiwarwarnak, kinuna ni Felipe nga iyun-unada ti pannakasangal ti constitution and by-laws ti organisasionda. Planoda pay ti mangisayangkat kadagiti literary seminar-workshop iti elementaria ken haiskul iti probincia iti pannakitinnulong ti TMIF. (Dadapilan.com)