Alegria T. Visaya

Umaw-aweng dayag ti naganmo

MMSU, aginakbay ayamuommo

Sapasap a pagilian, raemendaka

Wagaywaymo iti tangatang, lugayanda.

Agtutubo a mamati iti kari ti adal

Buyuganda laing iti anep ken saldet

Awitda nabirtud a karamba

Isakdo ita barukong, ubbog a nabiag.

Mannursuro a natenneb iti adal ken padas

Amin iti opisina makitunos, makidanggay

Makaay-ayo a musika ti inda maparnuay

Sagut ken agtutubo natudio a mabayabay.

Balligi dagiti annakmo iti pannubok ken salisal

Ita koronam, diamanteda a naibislibislin

Ita kuentasmo, perlasda a naubon-ubon

Idatagda kenka pagyaman a nabuslon.

Napakumbabaka latta, Unibersidad nga ulidan

Kas nabagas a dawa, agkurnoka pay iti daga

Ta dam-egnat’ nangtaraon, nangtapaya

Pundasionmo a nabaneg, Bagnos ti Amianan!